» GWAKAFWIKA (http://shakazulu.zeblog.com/)

On bèl woulo ba jenn siklis Gwadloup padavwa ékip a "Club Région Guadeloupe" fè on bèl travay. Tout ékip-la woulé fò douvan ba lidè a-y! Yo menné-y an pyé a montagn-la! An atlétizm, yo ka kriyé sa fè lyèv. Olivier Curier rivé dézyèm Bouyant, komin-la ola i tini lonbrik a-y ki téré. Adan klasman jénéral-la, Curier mayo jòn èvè 1min 51s asi vénézuélyen-la Becerra é 3min 08s asi pannyòl-la Mancebo. Adan sé di prèmyé a klasman jénéral-la, ou ka touvé kat gwadloupéyen, on biten lontan pèp Gwadloup pa té ko vwè! Aprézan toutmoun ka mandé-yo :" Ès on gwadloupéyen ké pé gannyé lantou-lasa?". Olivier Curier ké tini onlo goumé pou'y kenbé mayo-la, Boris Carène limenm a-y poko di dènyé mo a-y. Alò nou ké la pou nou vwè!
 
On dènyé biten! An pa ka pwan moun vini kon fwansé, kon misyé "Luc Leblanc"-la ka vin wouvè gèl a-y é vin mal palé siklis Gwadloup! Ou sé on moun vini, ou pa konnèt mès é labitid a péyi-la é ou ka vin wouvè gèl a-w pou di gwadloupéyen pa sav kouri bisiklèt?!! Si sé pou vin mal palé nou, pa lapenn déplasé Gwadloup, rété an péyi a-w! A pa padavwa ou vin chanpyon di mond pa aksidan, ou ka pèwmèt vou vin ba gwadloupéyen lèson! Gwadloupéyen, tèknisyen gwadloupéyen sav sa yo ni pou fè pou siklis an-nou vansé!

60èm lantou entènasyonal siklis Gwadloup 2010

6èm étap-la (Zabim - Bouyant)
1. Edwin Becerra (Vénézwèla)
2. Olivier Curier (Gwadloup)
3. Christophe Bétard (Matnik)

Klasman jénéral-la
1. Olivier Curier (Gwadloup)
2. Edwin Becerra (Vénézwèla) a 1min 51s
3. Francisco Mancebo (Èspagn) a 3min 08s