
Aprédavwa moun byen fété rivé a lanné 2010, moun ja ka paré pou fè mas a yo! Mé on dòt kalté mas kay pati an péyi-la, sé politisyen kay rantré adan élèksyon Réjyonal. Pou dékyouké Lirèl? Wi fò nou dékyouké-y kon moun dékyouké Micheaux an 2004! Dékyouké Lirèl pou fouté on moun menm biten-la, pli mové ankò? Awa! Fò gwadloupéyen gadé sa yo ka fè! Yonn adan sé gwan favori-la, sé Eric Jalton davwa mè Zabim-la soutyenn LKP dèpi mouvman-la komansé é i pou péyi-la vansé adan enstitisyon politik a-y. Nou ké la pou nou vwè! Nou ké la pou vwè si pèp-la ka dékyouké Lirèl é si'y ka fouté on nonm ki adan on larèl diféran ki Micheaux é Lirèl. Pawti politik ki adan LKP kay yo osi rantré adan élèksyon-lasa, la osi nou ké vwè ka sa ké bay! LKP li kant ay toujou a lendikatif prézan, plis ki janmen pèp-la èvè òganizasyon-lasa. LKP sé nou pèp Gwadloup! Léta kolonyal fwansé kay èché fouté on totoblo an péyi-la padavwa i wosé pri a ésans. La osi nou ké la pou nou vwè ki jan biten ka évoliyé!
2010, on lanné ola ékip nasyonal foutbòl an nou kay éséyé vwè si'y ka vin chanpyon a Karayib-la!
Adan larèl entènasyonal-la, 2010 sé ké on gwan lanné ba Lafwik di Sid padavwa péyi-lasa kay vini prèmyé péyi kay wousivwè on gwan konpétisyon ki sé lakoup di mond. Mé avan sa, jou dimanch 10 janvyé, péyi Angola kay wousivwè 27 èm koup a sé nasyon afwiken-la.
E sitou an ka èspéré kè CCN pa mò an men an nou!
Pour faire un trackback sur ce billet : http://shakazulu.zeblog.com/trackback.php?e_id=424208