

Yè swa an miting a LKP Lapwent, onlo moun té a lendikatif prézan kon a labitid owa bik-la. Léta kolonyal fwansé ki an sèvis a TOTAL bizwen pwan sa nou pèp Gwadloup nou gannyé asi yo! E sé kon sa yo désidé wosé pri a ésans dè 4 santim. 4 santim pou nou mété èvè 6 santim yo té fouté nou la an mwa sèptanm-la. Sa ka ja bay 10 santim é tini dòt òkmantasyon ka vini. Sé mésyé ka ban nou-y pa ti-mòso. Sé mésyé sé laSARA é pwensipal aksyonnè a laSARA sé TOTAL! TOTAL on miltinasyonal ki fè on bénéfis a 14 milya lanné pasé! A pa 14 milya chif dafè i fè sé byen on bénéfis a 14 milya! TOTAL sé lantoupriz ki pli fò an Fwans! TOTAL pli fò ki léta fwansé limenm. TOTAL ki yo té ka kriyé avan ELF, ka fèt é défèt gouvèlman an Afwik! TOTAL ka finansé pawti politik an Fwans! Lajan a LiMP (UMP) sé èvè TOTAL i ka woulé! A pa Sarkozy ka menné an Fwans, sé TOTAL!
Sé mésyé ka di ésans-la, sé an Ewòp di Nò yo ka achté-y. Mé ki entéré yo té'é ni achté-y Léwòp di Nò lè nou sav tini pétròl ki toupré nou? Ki entéré sé mésyé té'é ni péyé gwo mòso lajan pou fè pétròl travèsé gwan lanmè-la ki sé Latlantik? Pou yo péyé méyè maché fò yo achté-y koté pétròl-la pli pré kivédi an Karayib-la mé pwopagann a yo sé di konm nou ka woulé èvè loto ki sòti Léwòp, sé loto-lasa pé pa woulé èvè ésans a Karayib-la padavwa ésans-lasa té ké kyouyé motè a sé loto-la. Manti a yo! An Giyàn, ou tini loto ka woulé èvè ésans a Vénézwèla é Brézil! E jous a jòdi-jou pon loto ja mò an men a moun Giyàn! Sé menm biten adan tout Karayib-la! Alò pa tini loto éwopéyen ka woulé an Karayib-la? Pa tini loto éwopéyen ka woulé Domnik, Sentlisi, Trinidad é konsò? Sé mésyé a laSARA té ka di yo pa ka achté ésans an Karayib-la mé yè Eli Domota déklaré boug a laSARA di adan lanbasad a yo Bastè, yo ka èstoké ésans... Sentlisi! Ah bon? Sé sa LKP toujou té ka di! Alò an réyalité ésans ka koulé an bak a loto an nou ka sòti an Karayib-la, i pa ka sòti Léwòp di Nò!
Gouvènè Fabre di yè, fò yo bazé yo asi kou mondyal-la mé sa Fabre pa ka di Gwadloup, Matnik é Giyàn pa ka achté brit! Yo ka achté ésans-la tou rafiné! LaSARA limenm Matnik ka rafiné enki 30 % tout restan-la ja rafiné! Ewo-la pli fò ki dola-la é yo ka achté ésans-la èvè dola-la alòspoudonk yo ka péyé ésans-la méyè maché!
An ka sonjé an 2004 lanné ola moun té ka péyé ésans wo kon sa! Lè lidé a yo té ka di bésé asi pri-la, yo té ka woté 1, 2 santim mé lè yo té ka òkmanté-y, yo té ka fouté nou 10 santim anlè-y! Alò a pa pwofitasyon, moun ka kriyé sa? Lanné pasé lè baril-la té wo, ésans té wo an péyi-la mé on fwa i bésé, pri-la rété mwa é mwa menm biten an péyi an nou, i pa jen bésé! Sé mouvman a Lagiyàn é sitou mouvman a LKP ki fè si pri a ésans vin bésé Gwadloup! E lanné pwochenn laSARA bizwen pwan sa nou gannyé asi-y!
Mé lè yo ka òkmanté ésans-la, tout biten ka òkmanté padavwa adan on péyi pwès tout biten ka maché èvè ésans. Pou fè pen, boulanjé-la ka pétri pat a farin-la èvè on machin é machin-lasa ka woulé èvè gazòl. Alò si ésans ka òkmanté, pen-la oblijé òkmlanté! Chofè transpò an komen ka péyé ésans kon toutmoun lè sé pou yo chayé moun. Alò si ésans ka òkmanté, pri a biyé ka òkmanté. Sé ké menm biten pou bato é avyon! Pri a mawchandiz adan magazen a manjé ké òkmanté osi padavwa cha (camion an fwansé) ka menné mawchandiz adan sé magazen-lasa ka woulé èvè ésans. Ou tini tirbin ka touné é ki ka fè kouran! E èvè ki biten sé tirbin-la ka touné? Èvè gazòl! Sé ponp-la ka voyé dlo a kaz an nou, èvè ki biten yo ka maché? Èvè gazòl! Alò si gazòl ka òkmanté, kouran é dlo ka òkmanté! E nou pé kontinyé lis-la!
Alò sé pou sa nou pèp Gwadloup fò nou rété mobilizé davwa pa obliyé grèv-la té sispann i pa té arèsté! Dayè simenn pwochenn kay ni on miting mawdi Bastè, on lòt jédi Moul é yonn Lapwent vandrèdi. Sanmdi 9 janvyé, on gwan manman déboulé lari Lapwent pou nou montré léta kolonyal fwansé nou pa dakò èvè maji i ka fè anlè do an nou! Eli Domota di on pawòl ki fè toutmoun ri yè swa! I di : "Wi nou pé di fanmi, zanmi, vwazen an nou, bon lanné 2010! Mé pannan nou ka di sa, nou ka di yo randévou lè 9! E pou nou fè pli senp, nou pé di yo :"Bon nèf!" ".
Pour faire un trackback sur ce billet : http://shakazulu.zeblog.com/trackback.php?e_id=424117